តម្រងនោមរបស់មនុស្ស មានតួនាទីសំខាន់ណាស់ក្នុងការបញ្ចេញជាតិពុល ដែលខ្លួនយើង ផលិតមក និងបញ្ចេញទឹកនោម ធ្វើឱ្យមានលំនឹងទឹក និងសារធាតុរ៉ែ ធ្វើឱ្យមានលំនឹង អាស៊ីដ បាស (Acid base) សម្របសម្រួលសម្ពាធឈាម សម្របសម្រួលជាតិកាល់ស្យូម (Calcium) សម្រាប់សុខភាពឆ្អឹង ជាអ្នកផលិតអ័រម៉ូន អ៊ីរីដ្រូប៉ូយ៉ែទីន (Hormone Erythropoietin) សម្រាប់ផលិតគ្រាប់ឈាមក្រហម តែប្រសិនបើតម្រងនោមបាត់បង់សមត្ថភាព ការលាងឈាម គឺជាតម្រូវការចាំបាច់ ព្រោះយើងត្រូវតែធ្វើការលាងឈាម នៅពេលតម្រងនោមយើងខ្សោយដំណាក់កាលចុងក្រោយ ឬក៏ដំណាក់កាលកម្រិតទី៤ និងទី៥។
នេះជាការលើកឡើងរបស់លោកវេជ្ជបណ្ឌិត ចាន់ សុវណ្ណឌី នាយករងមន្ទីរពេទ្យសាកលវិទ្យា ល័យ អន្តរជាតិ សែន សុខ ក្នុងពិធីសិក្ខាសាលាមួយ កាលពីព្រឹកថ្ងៃទី ២៥ កក្កដា ២០១៤ នៅ សណ្ឋាគារ អ៊ីនធើរខន់ធីណិនថាល់ ក្រោមប្រធានបទ «ការគ្រប់គ្រងអ្នកជំងឺទឹកនោមផ្អែម មុននិងក្រោយការលាងឈាម»។ សិក្ខាសាលានេះរៀបចំឡើងដោយមន្ទីរពេទ្យសាកលវិទ្យាល័យអន្តរជាតិ សែន សុខ ដោយមានការចូលរួម ពីគ្រូពេទ្យជំនាញមកពីបណ្ដាមន្ទីរពេទ្យនានា ដូច ជា មន្ទីរពេទ្យព្រះកុសុមៈ មន្ទីរពេទ្យព្រះកេតុមាលា មន្ទីរពេទ្យកាល់មែត មន្ទីរពេទ្យរុស្ស៊ី ព្រមទាំងក្រុមវេជ្ជបណ្ឌិតល្បីៗ មកពីប្រទេសជប៉ុនជាច្រើនរូបទៀត។
នាយករងមន្ទីរពេទ្យសាកលវិទ្យាល័យ អន្តរជាតិ សែន សុខ លោកវេជ្ជបណ្ឌិត ចាន់ សុវណ្ណឌី បានមានប្រសាសន៍ថា ប្រធានបទខាងលើនេះ គឺដើម្បីពង្រឹងពង្រីកសមត្ថភាពគ្រូពេទ្យផ្នែកជំងឺទឹកនោមផ្អែម ឱ្យយល់ដឹងពីចំណីអាហារ ការពារកុំឱ្យអ្នកជំងឺទឹកនោមផ្អែមវិវត្តន៍ទៅជាខូច តម្រងនោម។ ជាងនេះទៅទៀត គឺចង់ឱ្យគ្រូពេទ្យ ផ្នែកតម្រងនោម ផ្នែកទឹកនោមផ្អែម និង ផ្នែកលាងឈាម យល់ដឹងពីបច្ចេកទេសថ្មីក្នុងការលាងឈាម ដែលទើបតែមាននៅក្នុងប្រទេសកម្ពុជា ជាពិសេស មជ្ឈមណ្ឌលលាងឈាម មិត្តភាពកម្ពុជា-ជប៉ុន នៃមន្ទីរពេទ្យសាកលវិទ្យាល័យ អន្តរជាតិ សែន សុខ។
លោកវេជ្ជបណ្ឌិត ចាន់ សុវណ្ណឌី បានបង្ហាញថា នៅពេលតម្រងនោមមិនដំណើរការ ផលអវិជ្ជមានជាច្រើនបានកើតឡើងក្នុងខ្លួនមនុស្ស ដូចជា ការចាល់ជាតិពុលក្នុងខ្លួន ការចាល់ ជាតិទឹកក្នុងខ្លួន មានទឹកនោមតិច ឬអត់ទឹកនោម យើងមានអារម្មណ៍សន្លឹម ងងុយដេក ហត់ មានសភាពស្លេកស្លាំង មានហើមនៅប្រអប់ជើង ព្រមទាំងមានជំងឺទឹកនោមផ្អែមផងដែរ។
ដូច្នេះការព្យាបាលអ្នកជំងឺខ្សោយតម្រងនោមដំណាក់កាលចុងក្រោយ មានដូចជា ការលាងឈាមនៅមន្ទីរពេទ្យ ធ្វើការលាងជាតិពុលតាមស្រោមពោះ ធ្វើការប្ដូរតម្រងនោម ការព្យាបាលអភិរក្ស។
សូមបញ្ជាក់ថា ការលាងឈាមបែបថ្មី បែបហាយក្លាស្ស មន្ទីរពេទ្យសាកលវិទ្យាល័យ អន្តរជាតិ សែន សុខ បានចុះអនុស្សរណៈជាមួយសាកលវិទ្យាល័យមួយនៅប្រទេសជប៉ុន ដែលមានក្រុមវេជ្ជបណ្ឌិត ៩ នាក់មកបង្ហាត់បង្រៀននៅមជ្ឈមណ្ឌលលាងឈាម មិត្តភាពកម្ពុជា-ជប៉ុន ចាប់តាំងពីឆ្នាំ ២០១០ មកម៉្លេះ មកដល់ពេលនេះ មានបទពិសោធន៍ជាង ១០ ឆ្នាំមកហើយ៕
